قصيدة امتحان

امتحان
يا رُبّما
تنده على ذرّات كيانك
تستجيب
أو ربما
تسأل زمانك
لا مُجيب
يا من فَجَرْتُو بعمركو
على وهم في سْرير السنين
المستهيب
"مين معترض؟
مين الملك
لإجابة في شعب السؤال؟"
الطين سأل
الأرض نبت بْيِتْنِبِتْ بالخير
علامة من اليقين عند الإله
والشرّ شرّ الإحتمال
عند البشر
يا من سمعتو الأجوبه
دون انتظاركو للكلام
(فاصل إيقاعى من عند كونشرتو الغياب)
ملك...
كتابه...
قول يا عم:
الحب فرح الحب غمّ
الحب شيء مبنى بعنصر من عناصر
انتصار/ انهزام
الملتقى بينك وبينك
أو
بينها وبين المسألة
هل معنى حبى إنى آجى واعتذر؟
أم إن معنى المعنى إنى آجى لكن ما اعتذرش؟
(فاصل إيقاعى من عند مدرسة الهزايم)
امتحان
ضع معنى كلمة "سور" في جملة من خيالك:
- السور مِسوَّر مهدنا ومهد البلاد
- السور سُوَار حوالين رِقاب كل العباد
- السو سِنان سانّهْ نيابها في انتظار طهو الجياد
- السور مدينة ما تفهموا
فيها بشر
أسواق
مساجد
أرصفه...
لكن مدينه ع الحياد
أكمل مكان نقط الفراغ:
- إنسان مخالف للضباب
يبقى سراب مالْهوش وجود
- فرْد فْ مدينه من نحاس
يبقى قُلِيبُه من صفيح كلهْ سدود
- ملك وجايب جنب عرشه جوز كلاب
يبقى بيشتم حاشيته فْ معنى الوفا
مفيش فراغ ولا فيه نقط
علشان مفيش أصلاً سؤال
"فاصل إيقاعى من عند موّالنا الصميم"
الأوّله
مكتوب علينا الغلب توبه
اتوب آنى
التانِيه
مَقرى ف عينينا التوبه
توبا نى
التالِته
مين تاب يتوب ربه عليه
يا يُمّه
طب وآنى؟

* * *