قصيدة عمري

ماشيين
ولإن الدنيا ما بتدّيش
محتاج ضحكة
ولإن الناس بتموت في اليوم
مرة و...
... مرة
مرّة
لَمّا الحمل يزيد حواليك
مرة
لما صورتها تيجى في إيديك
ولإنك لو صبّيت البحر ف إيدك
مش هاينوبك
إلا مكان ما هتاخد إيدك
فانا معرفش
ليه كل ما اشوفك أنا باعطش
بتخطّى سراب منقوش في كتاب
الحبر سنينه بتعوى
ف صحرا الروح
فنروح
ونلاقى الناس مش ناس
أطياف بتّدور من لحم ودم
مهجورة الكلمة ف حلق الهَمّ
لا هى راضية تعود للقلب تجرّح
ولا راضية تعدّى الحلق تسمّ
وانا ماعرفش
ليه كل ما اشوفك أنا باعطش
واحشانى يا بِنت
التلج النور والنار
وحشانى يا بِتّ
البحر بعيد غدّار
آخر جلاليبى بافردها
وعاملها شراع
عريان لاجلك
هابقى العمر بطوله
والبرد معلّم فوق تفاصيلى
كل حكاوى الشتا والناس
كداب مين قال الشتا إحساس
كداب مين قال الشتا ونّاس
الشتا بيزق الليل النايم
جوه أحضان الدمعة الماشية لحد البيت
الشتا بيصحى طابور الحزن
التايه جوه ملامحى
ما عارف إمتى الفرح ها يجرى
يروح ع الغيط
فيزرع جوه عيونك
شكل الكلمة الناقصة ما بينى
وبين حبّيت
وانا ماعرفش
ليه كل ما اشوفك أنا باعطش
مع إنى شربت كتير
من نبع دموعى السارى
جوّه وريدى كما التعاويذ
فأبعتر دمّى
وارْقينى
وألملم كلمة
"واحشاني"
واعملها حجاب
فتْدارى الولع المدّارى
ما بينى وبين كلمة
"واحشاك"
واحشانى يا بت
البحر بعيد
هانساك
مشتاق لى ياواد
الهمّ قريب
باهواك
وأخيرًا في الآخر شُفت
ليه كل ما اشوفك
أنا باعطش
* * *