اللون حيلة من الطبيعة

اللون حيلة من الطبيعة عشان تصورلنا معنى الحياة بكل ما فيها.
اللون لغز الحياة دافنة سرها جواه .
مين اللي يقدر يفك السر ويعرف الحقيقة غير لما يعدي على كل الألوان.
غير لما يتحول في الآخر للون....... تقدر تبقى أبيض؟
هتتْعدل في قعدتك وتقول طبعًا أقدر..... الأبيض مفيش زيه لون الصفاء والنقاء.
غلط...... الأبيض لون سرير المريض ولون التلج البرد الناخر في العضم
الأبيض لون المرض والبرد والأتنين أخرتهم ......... مووووت.
رد االلي بيفهم وقال: طب الأخضر؟ لون الطبيعة والجنة "متكئين على سرر خضر" ولون الزرع والخضرة وراحة البال.
الأخضر لون أعشاب الميه لما بتتحول للميه الراكدة
لا تقدر تشرب منها......... ولا تستعملها.
سيبك مالأخضر عمركش شوفت الشمس بتنور كل الدنيا باللون الأصفر
والدهب الدهب الجامد لونه الأصفر الدهب المال ....القوة.....السلطة.
تقصد الأصفر لون الصحرا العطش الجوع
ولاّ الأصفر لون الورقة الدبلانة......... والجو خريف
ولاّ الضحكة الصفرا وفي القلب حريق.
الحريق يطفى بميه والميه تعكس لون جميل لون السما الأزرق.
بكل جمالها وشموخها ومجهولها المخفي وراها....... السما بعمقها ورهبتها وجلالها.... السما اللي لما بنعوز حاجة بنبصلها.
شوفت واحد مات واستنوا شوية عليه
نفَسُه صفر نبضه صفر حركته صفر
جلده اتحول للأزرق بقى لونه أزرق صفر.
إنت بتحب الورد الحب؟
لو حبيت حد واديته وردة حمرا عشان تقوله باحبك وحبك بيجري في دمي
الدم الأحمر الدم اللي بيجري زي النهر في كل بلاد العالم
دم الطفل ولا دم الراجل ولا الست ولا العجوز ولا الأرامل أي دم تقصد؟
أقصد السواد اللي انت فيه مع إن الأسود هو الملك
بيخليينا نشوف النجوم والقمر
لما الليل يدخل والسما تضلم فنحس بجمال النور فيها من نجومها ونورها يهدي الناس طريقهم.
الأسود ملك صحيح لكنه ملك الحزن ملك الكآبة والهموم
ملك البكا على كل مفقود في الحياة
ملك انكسارك جوه منك لما تتمنى الحياة وماتحققش التمني.
آخر حاجة أقدر أقولها لك إنك حتى لو اتمنيت تقدر تحقق جزء ولو رمادي
جزء في النص ما بين الحلم والحياة
الرمادي جزء منّا جزء بيخلينا نقدر نعشق الحاضر وحلمه
نعشق الماضي وطغيانه الأثير في معنى القدرة للتغيير
نعشق المستقبل المجهول وعمقه في حبنا إنا نعرف
بس نعرف من غير خوف وبكل أمل
مهما كان الماضي حزن
مهما كان دلوفتي بُعد
مهما كان للبكرة هم " إن بعد العسر جاي لكن الإنسان عجول
إن بعد العسر جاي لكن الإنسان عجول"